السلام عليكم جميعاً و خاصةً طلاب البحوث الغوالي
حبيت احكي عن موضوع صرلو شاغل بالي فترة وأنا بشوفو مهم و حلو
بظن انو كلنا عنا فكرة عن اهمية وخطورة امن المعلومات لذلك حبيت اعرض نبذة او ملخص او خطوط عريضة_ سموها متل ما بدكن _عن التشفير
فينا نبلش بتعريف مثلاً
التشفير : هو مجموعة عمليات نجريها على نص عادي plain text أو معطيات أو معلومات بقصد جعلها غير مفهومة إلا لأشخاص المعنيين بهذه المعلومات والذين يستطيعون معرفة النص الأصلي انطلاقاً من النص المشفر decrypted text
طبعاً مو بس هدول الناس بيقدرو يقرأوا لنص المشفر
محللي الشيفرات كمان بيقدرو يقرأو النص المشفر بس بدهن وقت أطول
ملاحظة :
لايوجد شيفرة في العالم لا يمكن كسرها ولكن تستغرق بعضها وقتاً أطول من غيرها
والسبب بسيط جداً أن الشيفرة وضعها عقل بشري ولم تأت من المريخ لذلك لا يوجد سبب يمنع عقل بشري آخر من التفكير بالطريقة تفسها ناهيك عن عقل متخصص بفك الشيفرات
إضافةً إلى أن أغبى الطرق لفك الشيفرات ألا وهي تجريب كافة الاحتمالات الممكنة
صارت واردة بسبب وجود الحواسب العملاقة و غير العملاقة
(الله يخليلنا البرمجة)
فالقصد من تعقيد الشيفرة أو خوارزمية التشفير أو تعقيد المفتاح هو حماية المعلومة
لأطول فترة ممكنة بحيث تقفد أهميتها اذا اكتشفها العدو بعد هذه الفترة
أكيد الحكي مو كتير واضح (جننتنا يا زلمة شو عم تحكي شي مفتاح شي خوارزمية)
طيّب خلص فهمت عليكون
في طريقتين للتشفير
Symmetric key encryption التشفير بالمفتاح المتناظر
pubic key encryption التشفير بالمفتاح العام
بالنسبة للطريقة الأولى :
انظر الملف المرفق الأول
رايح بلش بمثال تخلّي الأمور أوضح
أقدم شيفرة معروفة اسما شيفرة قيصر (نسبة إلى يوليوس قيصر)
caesar's ciphering
ويمكن هي أبسط شيفرة
طريقة التشفير أو خوارزمية التشفير كالتالي
بتمسكو أول حرف و بتشوفو الحرف اللي بعدو بحرفين مثلاً بالأبجدية
وبتحطو محلو
بعدين بتمسكو الحرف التاني وبتشوفو الحرف اللي بعدو بحرفين بالأبجدية وبتحطو محلو
بعدين بتمسكو الحرف التالت ..... انفهمت مو هيك ؟
الطريقة هون هي التبديل أو الازاحة بمقدار ثابت وفق الترتيب الأبجدي
المفتاح هو مقدار هذه الإزاحة
يعني لحتى تقرأو النص المشفر لازم تعرفو الطريقة و المفتاح واحد منهون ما بيكفي لحالو
مثال :
تعو نشفر الجملة التالية بطريقة قيصر و المفتاح 3
Cyrano is the best
وبكل تواضع
C بعدين f,e,
d
y بعدين b,a
,z
كملو لحالكون بيطلع معكون
fbudr lv wkh ehvw
واللي بيقرأ هاذ النص الأزرق ما بيفهم شي و بالتالي ما بيئول عني شايف حالي
طبعاً لحتى تعرفو النص الأصلي المفتاح نفسو والطريقة بالعكس يعني بدل ما تمشو لإدام 3 حروف بترجعو 3 حروف
و من هون جاية كلمة متناظر Symmetric
طبعاً سهل إنو تحلو هالشيفرة لأنو ما عندكن كتير احتمالات 25 لأنو الحرف ما بيساوي نفسو
طبعاً هاد الحكي بالانكليزي أما بالعربي بيزيدو احتمالين
فيكون هذا متفضيين و ماعندكون شي تجربو تفكو الشيفرة بإيدكون أو ببساطة
تكتبو برنامج صغير يجرب كل المفاتيح (بتاكل معو ثواني الله يخليلنا الحاسب و البرمجة العزيزة) و بتشوفو الحلول المقترحة بيطلع معكون 24 نص مو مفهومين و واحد مفهوم موافق للمفتاح الصحيح
هي الشيفرة قديمة شوي عى زمن الرومان قبل الميلاد لما كان يوليوس قيصر قائد لحرب الغال Gallic war طبعاً بلاد الغال هي فرنسا متل ما بتعرفو (أيوا عند استيريكس و أوبيليكيس )
ما عجبتكون الطريقة ؟
خدو هي
monoalphabetic substitutions
بمعنى التبديل الأحادي (هيك ترجمتي والعلم عند الله ماني اختصاص ترجمة)
كمان هون منبدل كل حرف بحرف تاني بس هون بشكل عشوائي يعني
منبدل a ب t مثلاً و b ب k مثلاً
يعني منخربط ترتيب حروف الأبجدية ومنبدل كل حرف بالحرف الجديد اللي إلو نفس الترتيب بالأبجدية المخربطة تبعنا و اللي هي صارت المفتاح
هون إذا حدا قدر يعرف يفك حرف أو كلمة ما بيفهم الرسالة أو النص كلو
لازم كل المفتاح يعني كل حرف بشو بدلناه بينما بطريقة قيصر ازل عرفنا حرف أو كلمة عرفنا المفتاح
تعو نجرب
شوفو الملحق التاني
تعو نشفر الجملة الماضية نفسا
Cyrano is the best
C هي v
y هي z
r هي y ......
بيطلع معنا
vzydxh wa ujf bfau
شلون ؟
تمام
طبعاً لاحظتو انو طريقة قيصر هي كمان تبديل أحادي
حالة خاصة يعني
طبعاً ممكن نخلي الحاسب يولدلنا المفتاح انضمن عشوائية أكتر من ازا نحنا اخترعناه
ومع انو الاحتمالات هون اكتر بكتيييييير بس للأسف هالشيفرة مانا قوية كتير
ليش ؟
الحاسب ما بيعرف كبير بيجرب 26! مفتاح شو هالمشكلة
غير هيك ممكن نقللو الحتمالات لأنو الطرق المعتمدة عالتبديل الأحادي فيها عيب أو نقطة ضعف
الأحرف يا شباب مو كلها متل بعضا في شي بيتكرر أكتر من الباقي
مثلاً بالانكليزي اكتر شي حرف ال E
بعدين t,r,n,i,a,o,s
بينما الأحرف z,j,k,q,x
أندر الحروف
وعنا ثتائيات و ثلاثيات ورباعيات شهيرة بتتكرر متل ما هية مثلاً
ch,th,sh,tion,sion
وكل حرف أو مجموعة أحرف إلو نسبة إحصائية للتكرار مثلاً من كل مية حرف منلاقس تقريباً 12 حرف e وبحالتنا هي الحرف اللي بدلناه بال e
طبعاً لكل لغة في خصائص احصائية بالعربي أكتر حرف بيتكرر
الألف طبعاُ و أكتر ثتائية هي ال التعريف
فإذا عنا نص مشفر طويل كفاية أو مجموعة نصوص مشفرة بالمفتاح نفسو
فينا نحزر بعض الحروف من التكرارات الموجودة بمقارنة نسب التكرار مع النسب المعروفة وبالتالي بينزل عدد الحتمالات بشكل مخيف
الملحق 3 جدول لنسب التكرار بالأنكليزي
في طريقة مساعدة كمان هي انو يكون عندك فكرة عن محتوى النص الأصلس أو موضوعو مثلاً في كلمة لازم تتكرر كتير أو لازم تكون بالأول
هيك بيفكو اللغات القديمة و النقوش أنا بتذكر شفت وثائقي كانو عم بيفكو نقش جداري في بلاد فارس بلغة عير معروفة فافترضو أنو اكتر كلمة تكررت هي كلمة "الملك" و بناءً على هالفرضية انحلت النقوش كلها
يا شباب الموضوع طويل وإلو جزء تاني رجاء خاص اللي عندو انتقاد من اي نوع يقولو
اللي عندو سؤال يسأل
الجزأ التاني بينزل قريباً منذكر طريق تالتة بتعتمد على مفتاح هو كلمة عادية ومنحكي عن النوه التاني
دمتم سالمين